విఘ్నాలు తొలగి.. రాష్ట్రం సుభిక్షంగా ఉండాలి

వినాయకుడి ఆశీస్సులతో ప్రతి ఇంటా సుఖసంతోషాలు వెల్లివిరియాలి సతీమణి భువనేశ్వరి, మనుమడు దేవాన్ష్‌తో కలిసి విఘ్నేశ్వరుడికి సీఎం చంద్రబాబు పూజలు వినాయకుడి ఆశీస్సులతో ప్రతి ఇంటా సుఖసంతోషాలు వెల్లివిరియాలని, రాష్ట్రాభివృద్ధికి ఎదురయ్యే విఘ్నాలన్నీ తొలగి ఆంధ్రప్రదేశ్‌ సుభిక్షంగా ఉండాలని ముఖ్యమంత్రి నారా చంద్రబాబునాయుడు ఆకాంక్షించారు. వినాయక చవితి సందర్భంగా తన సతీమణి నారా భువనేశ్వరి, మనుమడు దేవాన్ష్‌తో కలిసి తన నివాసంలో విఘ్నేశ్వరుడికి భక్తిశ్రద్ధలతో పూజలు నిర్వహించారు. కుటుంబ సభ్యులతో కలిసి గణనాథుడిని పూజించి రాష్ట్ర ప్రజల సంక్షేమం, రాష్ట్రాభివృద్ధి కోసం ప్రార్థించారు. జ్ఞానం.. వివేకం.. విజయానికి ప్రతీక కుటుంబ సభ్యులతో కలిసి నిర్వహించిన గణనాథుడి పూజ ఎంతో గొప్ప ఆధ్యాత్మిక అనుభూతినిచ్చిందని సీఎం చంద్రబాబు తెలిపారు. గణపతి జ్ఞానం, వివేకం, విజయానికి ప్రతీక అని పేర్కొన్నారు. ఏ శుభకార్యాన్నైనా వినాయక పూజతో ప్రారంభించడం మన సంప్రదాయమన్నారు. విఘ్నాలను తొలగించి సన్మార్గాన్ని చూపే గణనాథుడి అనుగ్రహం అందరిపై ఉండాలని ఆకాంక్షించారు. ఐక్యతను చాటే వేడుకలు వినాయక చవితి వేడుకలు ప్రజల్లో సామాజిక స్పృహ, ఐక్యత, సమష్టితత్వాన్ని పెంపొందిస్తాయని చంద్రబాబు అన్నారు. సమాజాన్ని సన్మార్గంలో నడిపించడంలో ధార్మిక కార్యక్రమాలు కీలక పాత్ర పోషిస్తాయన్నారు. వాడవాడలా మండపాలు ఏర్పాటు చేసి నిర్వహించే వినాయక చవితి వేడుకలు ప్రజల మధ్య సోదరభావాన్ని మరింత బలోపేతం చేస్తాయని పేర్కొన్నారు. రాష్ట్రం సుభిక్షంగా ఉండాలని ప్రార్థన వినాయక చవితి వేడుకలు మన సంస్కృతి, సంప్రదాయాలకు, ఆధ్యాత్మిక చైతన్యానికి ప్రతీకలని సీఎం తెలిపారు. గణనాథుడి ఆశీస్సులతో రాష్ట్రాభివృద్ధికి ఎదురయ్యే విఘ్నాలన్నీ తొలగి ఆంధ్రప్రదేశ్‌ సుభిక్షంగా ఉండాలని, తెలుగు జాతి వర్ధిల్లాలని ప్రార్థించినట్లు చెప్పారు. రాష్ట్ర ప్రజలందరికీ వినాయక చవితి శుభాకాంక్షలు తెలిపారు.