*పర్చూరులో "సాంబన్న"చారిత్రాత్మక ప్రభంజనం!*
ఏలూరి నాయకత్వానికి ప్రజల జేజేలు
•82 ఎంపీటీసీ స్థానాల్లో 70 కూటమి కైవసం..
•ఆరు జెడ్పీటీసీలూ కూటమి ఖాతాలోకే!
•65 స్థానాల్లో టీడీపీ,5స్థానాల్లో జనసేన ఘన విజయం
•మార్టూరులో 13,868 ఓట్ల భారీ మెజార్టీ..
పర్చూరు:
పర్చూరు నియోజకవర్గ రాజకీయ చరిత్రలో ఎమ్మెల్యే ఏలూరి సాంబశివరావు నాయకత్వంలో కూటమి అపూర్వ విజయాన్ని నమోదు చేసింది. స్థానిక సంస్థల ఎన్నికల్లో ఆరు జెడ్పీటీసీ స్థానాలనూ కైవసం చేసుకోవడంతో పాటు, మొత్తం 82 ఎంపీటీసీ స్థానాలకు గాను 70 స్థానాల్లో విజయం సాధించి తన తిరుగులేని ఆధిపత్యాన్ని చాటుకుంది. వీటిలో 65 స్థానాల్లో తెలుగుదేశం పార్టీ అభ్యర్థులు, ఐదు స్థానాల్లో జనసేన అభ్యర్థులు విజయకేతనం ఎగురవేశారు. వైఎస్సార్ కాంగ్రెస్ పార్టీ 12 స్థానాలకే పరిమితమైంది. నియోజకవర్గంలోని ఆరు మండలాల్లోనూ కూటమి అభ్యర్థులకు ప్రజలు బ్రహ్మరథం పట్టడం విశేషం.
*ఆరు జెడ్పీటీసీల్లోనూ కూటమి జయకేతనం*
జెడ్పీటీసీ ఎన్నికల్లోనూ కూటమి అభ్యర్థులు ఘన విజయాలు నమోదు చేశారు. మార్టూరు నుంచి టీడీపీ అభ్యర్థి షేక్ రజాక్ 13,868 ఓట్ల భారీ మెజార్టీతో విజయం సాధించి నియోజకవర్గంలోనే అత్యధిక ఆధిక్యాన్ని నమోదు చేశారు. చిన్నగంజాం నుంచి నక్కల రాఘవ 8,276 ఓట్ల మెజార్టీతో, పర్చూరు నుంచి కూటమి అభ్యర్థి కలవకూరి పిచ్చమ్మ 5,649 ఓట్ల మెజార్టీతో గెలుపొందారు. కారంచేడు నుంచి పోతిన సరిత 5,716 ఓట్ల మెజార్టీతో, యద్దనపూడి నుంచి డక్కుమల్లి పల్లవి 5,433 ఓట్ల మెజార్టీతో, ఇంకొల్లు నుంచి పూజల శ్రీనివాసరావు 4,192 ఓట్ల మెజార్టీతో విజయం సాధించారు. ఆరు మండలాల్లోనూ జెడ్పీటీసీ స్థానాలను కూటమి గెలుచుకోవడం ఏలూరి నాయకత్వానికి ప్రజలు ఇచ్చిన బలమైన మద్దతుగా నిలిచింది.
*ఎంపీటీసీల్లోనూ మండలాలన్నింటా కూటమి హవా*
ఎంపీటీసీ ఎన్నికల్లోనూ కూటమి అభ్యర్థులు సత్తా చాటారు. మార్టూరు మండలంలో 19 స్థానాలు, పర్చూరులో 13, కారంచేడులో 10, చిన్నగంజాంలో 10, ఇంకొల్లులో 10, యద్దనపూడిలో 8 స్థానాల్లో కూటమి అభ్యర్థులు విజయం సాధించారు. మొత్తం 70 స్థానాల్లో కూటమి గెలుపొందగా, అందులో టీడీపీ 65, జనసేన ఐదు స్థానాలను దక్కించుకున్నాయి. వైసీపీ 12 స్థానాలతో సరిపెట్టుకుంది. ఆరు మండలాల్లోనూ కూటమికి లభించిన ఈ ఆధిక్యం గ్రామీణ స్థాయిలో పార్టీ పటిష్ఠతను చాటిచెప్పింది.
*సాంబన్న కృషికి ప్రజల విజయహారం*
ఈ విజయానికి ప్రధాన కారణంగా ఎమ్మెల్యే ఏలూరి సాంబశివరావు చేసిన నిరంతర కృషి, పార్టీ శ్రేణులను సమన్వయం చేసిన తీరు నిలిచాయి. నియోజకవర్గ అభివృద్ధి, సంక్షేమ పథకాల అమలు, గ్రామీణ ప్రాంతాల్లో మౌలిక సదుపాయాల కల్పనకు ఆయన ప్రాధాన్యమిచ్చారు. ప్రజలకు అందుబాటులో ఉంటూ వారి సమస్యలను తెలుసుకోవడం, వాటి పరిష్కారానికి అధికారులతో నిరంతరం సమీక్షలు నిర్వహించడం, గ్రామాల వారీగా అభివృద్ధి కార్యక్రమాలను ముందుకు తీసుకెళ్లడం ప్రజల్లో విశ్వాసాన్ని పెంచాయి.
ఎన్నికల సమయంలో అభ్యర్థుల ఎంపిక నుంచి క్షేత్రస్థాయి ప్రచారం వరకు ఏలూరి ప్రత్యేక శ్రద్ధ చూపారు. టీడీపీ, జనసేన నాయకులు, కార్యకర్తల మధ్య సమన్వయం సాధిస్తూ కూటమి అభ్యర్థుల విజయానికి సమష్టి కృషి జరిగేలా మార్గనిర్దేశం చేశారు. ఇంటింటి ప్రచారం, బూత్ స్థాయి కార్యాచరణ, గ్రామస్థాయి నాయకులతో నిరంతర సంప్రదింపుల ద్వారా పార్టీ శ్రేణులను ఎన్నికల సమరానికి సిద్ధం చేశారు. కూటమి ఐక్యతను క్షేత్రస్థాయిలో బలోపేతం చేయడంలో ఆయన పాత్ర కీలకంగా నిలిచింది.
*కష్టకాలంలో ప్రజలకు అండగా.. అభివృద్ధిలో ముందడుగు*
మురసు తుఫాను ప్రభావంతో నియోజకవర్గం అతలాకుతలమైన సమయంలోనూ ఏలూరి ప్రజలకు అందుబాటులో ఉంటూ సహాయక చర్యలను పర్యవేక్షించారు. విద్యుత్ సరఫరా పునరుద్ధరణ, దెబ్బతిన్న రహదారులు, ఇళ్లు, పంటల నష్టం వివరాల సేకరణ, బాధితులకు సహాయం అందించే అంశాలపై అధికారులను అప్రమత్తం చేశారు. తుఫాను కష్టకాలంలో ప్రజలకు అండగా నిలిచిన ఆయన కార్యాచరణ కూడా ప్రజల్లో సానుకూల ప్రభావం చూపింది.
*చరిత్రలో నిలిచే ప్రజాతీర్పు*
ఒకవైపు ఆరు జెడ్పీటీసీ స్థానాలన్నీ, మరోవైపు 82 ఎంపీటీసీ స్థానాల్లో 70 స్థానాలను కూటమి గెలుచుకోవడం పర్చూరు నియోజకవర్గ రాజకీయాల్లో ప్రత్యేక ఘట్టంగా నిలిచింది. 65 ఎంపీటీసీ స్థానాల్లో టీడీపీ, ఐదు స్థానాల్లో జనసేన విజయం సాధించడం కూటమి ఐక్యతకు ప్రతీకగా నిలిచింది. ఈ ఫలితాలు ఎమ్మెల్యే ఏలూరి సాంబశివరావు నాయకత్వంపై ప్రజలకు ఉన్న నమ్మకాన్ని, అభివృద్ధి–సంక్షేమ కార్యక్రమాలకు లభించిన ఆదరణను ప్రతిబింబిస్తున్నాయి. కార్యకర్తల కష్టం, నాయకుల సమన్వయం, ప్రజల ఆశీర్వాదం కలిసివచ్చి కూటమికి ఈ అపూర్వ విజయాన్ని అందించాయి. పర్చూరులో సాంబన్న నాయకత్వానికి ప్రజలు అందించిన ఈ విజయహారం రాజకీయంగా చిరస్మరణీయంగా నిలవనుంది.