ఎమ్మెల్యే ఏలూరిపై హోంమంత్రి అనిత ప్రశంసల జల్లు

రైతు కుటుంబం నుంచి రాజకీయ ప్రస్థానం ప్రారంభించి..ప్రజల ఆదరాభిమానాలతో ఎదిగి.. పర్చూరు నియోజకవర్గ అభివృద్ధికి సారథిగా నిలిచిన ఎమ్మెల్యే ఏలూరి సాంబశివరావుపై రాష్ట్ర హోం,విపత్తు నిర్వహణ శాఖల మంత్రి వంగలపూడి అనిత ప్రశంసల వర్షం కురిపించారు. సామాన్యుల కష్టాలను స్వయంగా తెలిసిన నాయకుడిగా, ప్రతి ఒక్కరినీ పేరు పెట్టి ఆప్యాయంగా పలకరించే వ్యక్తిగా, అన్నదమ్ములకు.. ఆడబిడ్డలకు అండగా నిలిచే మనసున్న మనిషిగా ఏలూరి ప్రజలకు చేరువయ్యారని కొనియాడారు.రాజకీయ హేమాహేమీలను ఎదుర్కొని ప్రజల ఆశీర్వాదంతో ఎమ్మెల్యేగా ఎదిగిన ఆయన.. నియోజకవర్గాన్ని అభివృద్ధి పథంలో నడిపిస్తున్నారని పేర్కొన్నారు. ప్రతి ఒక్కరినీ పేరు పెట్టి పలకరించే నాయకుడు ప్రజాప్రతినిధిగా పదవికే పరిమితం కాకుండా ప్రజలతో మమేకమవుతూ, వారి కష్టసుఖాల్లో భాగస్వామిగా నిలవడం ఏలూరి ప్రత్యేకత అని అనిత అన్నారు. నియోజకవర్గంలో ఎవరిని కలిసినా పేరు పెట్టి పలకరించడం, ఆప్యాయంగా మాట్లాడటం, సమస్యలను ఓపికగా వినడం ఆయనకు ప్రజలతో ఉన్న అనుబంధానికి నిదర్శనమని పేర్కొన్నారు. ప్రతి ఇంటి వ్యక్తిగా, ప్రతి కుటుంబానికి ఆప్తుడిగా ఉండే నాయకత్వం ప్రజల్లో విశ్వాసాన్ని పెంచిందని తెలిపారు. రైతుల కలకు గెజిట్‌తో సాకారం దిశగా.. గుంటూరు ఛానల్‌ పొడిగింపునకు గెజిట్‌ నోటిఫికేషన్‌ రావడం పర్చూరు ప్రాంత రైతులకు ఎంతో శుభపరిణామమని హోంమంత్రి అన్నారు. ఈ విషయం తెలిసిన వెంటనే రైతులతో కలిసి ఆనందాన్ని పంచుకోవడం ఏలూరికి వ్యవసాయంపై, రైతుల ప్రయోజనాలపై ఉన్న మక్కువను తెలియజేస్తోందని చెప్పారు. రైతుల సాగునీటి అవసరాలను తీర్చేందుకు ఆయన చూపుతున్న చొరవ అభినందనీయమని పేర్కొన్నారు. వ్యవసాయం.. ఉపాధి.. పరిశ్రమలకు ప్రాధాన్యం పర్చూరు నియోజకవర్గ అభివృద్ధికి ఏలూరి సాంబశివరావు ప్రత్యేక శ్రద్ధ చూపుతున్నారని అనిత తెలిపారు. హార్టికల్చర్‌ హబ్‌ ఏర్పాటు, పామాయిల్‌ సాగు విస్తరణ, సూక్ష్మ, చిన్న, మధ్యతరహా పరిశ్రమల ప్రోత్సాహం వంటి కార్యక్రమాల ద్వారా వ్యవసాయంతోపాటు ఉపాధి అవకాశాల పెంపునకు కృషి చేస్తున్నారని వివరించారు. గ్రామీణ ప్రాంతాల అవసరాలను గుర్తించి, దీర్ఘకాలిక ప్రయోజనాలను దృష్టిలో ఉంచుకుని అభివృద్ధి కార్యక్రమాలను ముందుకు తీసుకెళ్తున్నారని ప్రశంసించారు. పేదల వైద్యానికి భరోసా.. సీఎంఆర్‌ఎఫ్‌లో ప్రత్యేక గుర్తింపు ముఖ్యమంత్రి సహాయ నిధి ద్వారా పర్చూరు నియోజకవర్గ ప్రజలకు సుమారు రూ.22 కోట్ల మేర ఆర్థిక సాయం అందడం ఏలూరి ప్రజాసేవకు నిదర్శనమని హోంమంత్రి పేర్కొన్నారు. ఆర్థిక ఇబ్బందులతో వైద్యం చేయించుకోలేని పేదలు, సామాన్యులకు అండగా నిలుస్తూ సీఎంఆర్‌ఎఫ్‌ సాయం అందేలా ఆయన ప్రత్యేక శ్రద్ధ తీసుకుంటున్నారని తెలిపారు. ప్రజల ఆరోగ్యం, సంక్షేమం పట్ల బాధ్యతతో వ్యవహరించడం ఆయన సేవాభావాన్ని ప్రతిబింబిస్తోందన్నారు. చంద్రబాబు ప్రియశిష్యుడు.. పర్చూరుకు అభివృద్ధి వరాలు ‘‘మీ ఏలూరి సాంబశివరావు ముఖ్యమంత్రి చంద్రబాబునాయుడికి ప్రియశిష్యుడు. ముఖ్యమంత్రి సహకారంతో పర్చూరు నియోజకవర్గానికి ఎన్నో అభివృద్ధి కార్యక్రమాలు తీసుకొస్తున్నారు’’ అని అనిత అన్నారు. ఏలూరి చొరవకు ముఖ్యమంత్రి సహకారం తోడవడంతో నియోజకవర్గంలో అభివృద్ధి పనులకు ఊతం లభిస్తోందని తెలిపారు. ప్రజల అవసరాలను ప్రభుత్వ దృష్టికి తీసుకెళ్లి, వాటిని పరిష్కరించేందుకు కృషి చేయడంలో ఏలూరి ముందుంటున్నారని ప్రశంసించారు. రైతు కుటుంబ నేపథ్యం.. ప్రజలతో విడదీయలేని అనుబంధం.. అభివృద్ధిపై స్పష్టమైన దృక్పథం.. ముఖ్యమంత్రి చంద్రబాబుతో సమన్వయం.. ఈ లక్షణాలన్నీ ఏలూరి సాంబశివరావును పర్చూరు ప్రజలకు మరింత చేరువ చేశాయని హోంమంత్రి అనిత కొనియాడారు. ప్రజల ఆశీర్వాదాన్ని బలంగా మార్చుకుని, అభివృద్ధిని లక్ష్యంగా చేసుకుని ముందుకు సాగుతున్న ఏలూరి నాయకత్వం పర్చూరు ప్రగతిలో ప్రత్యేక ముద్ర వేస్తోందని ఆమె స్పష్టం చేశారు.