గుడిసెల్లేని తెలంగాణ" లక్ష్యం

హైదరాబాద్,జూలై 2: క్యూర్(కోర్ అర్బన్ రీజియన్‌)పరిధిలోని ఇన్నర్ రింగ్ రోడ్ ప్రాంతంలో లక్ష ఇందిరమ్మ ఇళ్ల నిర్మాణానికి రాష్ట్ర ప్రభుత్వం త్వరలోనే టెండర్లు పిలవనున్నట్లు రాష్ట్ర రెవెన్యూ, హౌసింగ్, సమాచార పౌర సంబంధాల శాఖ మంత్రి పొంగులేటి శ్రీనివాసరెడ్డి వెల్లడించారు. గురువారం గోషామహల్ నియోజకవర్గంలో నిర్మించిన డబుల్ బెడ్‌రూమ్ ఇళ్ల పట్టాలను లబ్ధిదారులకు అందజేసిన సందర్భంగా ఆయన మీడియాతో మాట్లాడారు. రెండు మూడు రోజుల్లో స్థలాల సేకరణ పూర్తి ముఖ్యమంత్రి రేవంత్ రెడ్డి ఆదేశాల మేరకు మూడు కార్పొరేషన్ల పరిధిలో లక్ష ఇళ్ల నిర్మాణానికి అవసరమైన స్థల సేకరణ మరో రెండు మూడు రోజుల్లో పూర్తి చేయనున్నట్లు మంత్రి తెలిపారు. ఈ కార్యక్రమంలో మంత్రులు పొన్నం ప్రభాకర్, మహ్మద్ అజారుద్దీన్, అడ్లూరి లక్ష్మణ్, ఎంపీ అనిల్ కుమార్ యాదవ్, స్థానిక ఎమ్మెల్యే రాజాసింగ్ తదితరులు పాల్గొన్నారు. ప్రతి పేద కుటుంబానికి ఇల్లే లక్ష్యం గత ప్రభుత్వాల మాదిరిగా కాకుండా కాంగ్రెస్ ప్రభుత్వం "ప్రతి పేద కుటుంబానికి ఇల్లు" అనే లక్ష్యంతో ముందుకు సాగుతోందని మంత్రి స్పష్టం చేశారు. క్యూర్ పరిధిలోని 19 నియోజకవర్గాల్లో పైలట్ ప్రాజెక్ట్ కింద ఒక్కో చోట కనీసం 500 నుంచి 1000 ఇళ్ల నిర్మాణాన్ని ప్రారంభించనున్నట్లు తెలిపారు. అనంతరం రెండో, మూడో విడతల్లో మరిన్ని ఇళ్లు మంజూరు చేస్తామని వెల్లడించారు. భూముల విలువను పక్కనబెట్టి పేదలకే పట్టాలు గ్రామీణ ప్రాంతాల్లో ఇప్పటికే ఒక్కో నియోజకవర్గానికి 5500 వరకు ఇళ్లు కేటాయించిన విషయాన్ని మంత్రి గుర్తు చేశారు. పట్టణ ప్రాంతాల్లో భూమి విలువ ఎకరాకు రూ.100 నుంచి రూ.200 కోట్ల వరకు ఉన్నప్పటికీ, ఆ విలువను పక్కనబెట్టి పేదలకు అదే ప్రాంతంలో ఇళ్లు నిర్మించి వారి పేరిట పట్టాలు ఇస్తామని స్పష్టం చేశారు. ధూల్‌పేటలో అసంపూర్తి ఇళ్ల పూర్తికి చర్యలు ధూల్‌పేట ప్రాంతంలో గత ప్రభుత్వ హయాంలో అసంపూర్తిగా నిలిచిపోయిన 125 ఇళ్ల నిర్మాణాన్ని పూర్తి చేసి అందజేస్తున్నామని మంత్రి తెలిపారు. మిగిలిన పేదలకు కూడా ఇళ్లు మంజూరు చేసేందుకు పరిసర ప్రాంతాల్లో స్థలాలు గుర్తించాలని కలెక్టర్‌ను ఆదేశించినట్లు వెల్లడించారు. ఈ విషయంలో ఎవరూ నిరాశ చెందాల్సిన అవసరం లేదని భరోసా ఇచ్చారు. జీవనాధారాలకు దగ్గరగానే ఇళ్లు పేదలను నగరాల నుంచి 30 కిలోమీటర్ల దూరంలోకి తరలించి ఇళ్లు కట్టే విధానం కాంగ్రెస్ ప్రభుత్వంలో ఉండదని మంత్రి స్పష్టం చేశారు. లబ్ధిదారుల జీవనాధారాలకు దగ్గరగా, అదే నియోజకవర్గ పరిధిలోనే ఇళ్లు అందించడం ప్రభుత్వ కట్టుబాటు అని పేర్కొన్నారు. బీఆర్ఎస్‌పై విమర్శలు పదేళ్ల బీఆర్ఎస్ పాలనలో నిర్మించిన ఇళ్ల కంటే కేవలం రెండున్నరేళ్లలోనే కాంగ్రెస్ ప్రభుత్వం ఎక్కువ ఇళ్లు నిర్మిస్తుందని, అది సాధ్యం కాకపోతే రానున్న ఎన్నికల్లో పోటీ చేయనని తాను గతంలో విసిరిన సవాల్‌కు ఇప్పటివరకు బీఆర్ఎస్ నేతల నుంచి స్పందన రాలేదని మంత్రి గుర్తుచేశారు. పేదల ఇళ్ల నిర్మాణంలో ప్రయోజనం లేదనే ఆలోచనతో బీఆర్ఎస్ ప్రభుత్వం భారీ ప్రాజెక్టుల పేరుతో అవినీతికి పాల్పడిందని ఆరోపించారు. "గుడిసెల్లేని తెలంగాణ" లక్ష్యం కాంగ్రెస్ ప్రభుత్వం అదే నిధులను పేదల గూడు కోసం వినియోగిస్తోందని, ప్రజల సంక్షేమమే తమ ప్రభుత్వ ధ్యేయమని మంత్రి పొంగులేటి పేర్కొన్నారు. ఇందిరమ్మ ఇళ్ల పథకం ద్వారా గుడిసెల్లేని తెలంగాణ లక్ష్యాన్ని సాధిస్తామని ఆయన స్పష్టం చేశారు.