సిపిఎం సీనియర్ నేత సారంపల్లి మల్లారెడ్డి కన్నుమూత

హైదరాబాద్, ఆగస్టు 24: తెలంగాణ రైతాంగ చరిత్రను వర్తమాన తరాలకు అందించడంలో అలుపెరగని కృషి చేసిన ఆ యోధుడు ఇక లేరు. దశాబ్దాలుగా రైతు పోరాటాలకు వెన్నుదన్నుగా నిలిచిన సీపీఐ(ఎం) సీనియర్ నేత, అఖిల భారత కిసాన్ సభ (ఏఐకేఎస్) ఉపాధ్యక్షులు సారంపల్లి మల్లారెడ్డి (88) సోమవారం తెల్లవారుజామున కన్నుమూశారు. తెలంగాణ సాయుధ రైతాంగ పోరాట చరిత్రను, పీడిత ప్రజల గోడును ప్రతి వేదికపైనా వినిపించిన ఆయన స్వరం ఇక మూగబోయింది. నాలుగు రోజులుగా చికిత్స... ఫలించని ప్రయత్నాలు వయోభారంతో పాటు శ్వాసకోశ సమస్యలతో బాధపడుతున్న మల్లారెడ్డి గత నాలుగు రోజులుగా హైదరాబాద్‌లోని నిమ్స్ ఆస్పత్రిలో చికిత్స పొందుతున్నారు. ఆదివారం అర్ధరాత్రి ఆయన ఆరోగ్యం మరింత విషమించడంతో వైద్యులు అత్యవసర చికిత్స అందించారు. అయినప్పటికీ ఫలితం లేకపోయింది. సోమవారం తెల్లవారుజామున 3.30 గంటలకు ఆయన తుదిశ్వాస విడిచారు. మల్లారెడ్డి భౌతికకాయాన్ని నిమ్స్ మార్చురీలో భద్రపరిచారు. రైతు ఉద్యమానికి తీరని లోటు విషయం తెలుసుకున్న సీపీఐ(ఎం) పొలిట్‌బ్యూరో సభ్యులు బి.వి.రాఘవులు, రైతు సంఘం ప్రధాన కార్యదర్శి టి.సాగర్, కేవీపీఎస్ ప్రధాన కార్యదర్శి స్కైలాబ్ బాబు, సీపీఐ(ఎం) రాష్ట్ర కమిటీ సభ్యులు బాబూరావు తదితరులు మల్లారెడ్డి భౌతికకాయానికి నివాళులర్పించారు. ఆయన మరణం పట్ల పలువురు నేతలు తీవ్ర దిగ్భ్రాంతి వ్యక్తం చేశారు. ఇది ప్రజా ఉద్యమాలకు, రైతాంగ పోరాటాలకు తీరని లోటని పేర్కొంటూ కుటుంబ సభ్యులకు ప్రగాఢ సానుభూతి తెలిపారు. చరిత్రకు సాక్షిగా నిలిచిన నేత రైతు సంఘం జాతీయ ఉపాధ్యక్షులుగా, సీపీఎం సీనియర్ నేతగా మల్లారెడ్డి తెలంగాణ సాయుధ రైతాంగ పోరాట వాస్తవ చరిత్రను భావితరాలకు అందించాలని నిరంతరం పిలుపునిచ్చేవారు. స్థానిక, భూ సమస్యలపై కేంద్రీకరించి పనిచేయాలని, మారుతున్న పరిస్థితులకు అనుగుణంగా రైతు సంఘం నేతలు అధ్యయనాన్ని పెంచుకోవాలని ఆయన పలు వేదికలపై సూచించారు. మల్లారెడ్డికి భార్య భాగ్యలక్ష్మి, కుమారులు వాసుదేవరెడ్డి, మధుసూదన్‌రెడ్డి, కుమార్తె సునీత ఉన్నారు.